माधव नेपालले आफूनिकट केन्द्रीय सदस्यहरुको बैठक बोलाए

३१ बैशाख २०७८, कोशीपारी अनलाइन संवाददाता/ काठमाडौ नेकपा एमालेका वरिष्ठ नेता माधवकुमार नेपालले आफूपक्षीय केन्द्रीय सदस्यहरुको बैठक बोलाएका छन् । शुक्रबार दिउँसो साढे २ बजे भर्चुअल माध्यमबाट बैठक बस्न लागेको स्थायी कमिटी सदस्य बेदुराम भुसालले जानकारी दिए । केन्द्रीय सदस्यको बैठकअघि नेता माधवकुमार नेपालले आफूनिकट स्थायी कमिटी सदस्यहरुसँग पनि छलफल गरेका थिए । नेता नेपालले बिहीबार अध्यक्ष केपी ओलीसँग एक्लाएक्लै वार्ता गरेर विवाद समाधान गर्ने सहमति गरेका थिए । उक्त सहमतिले एमाले विवाद समाधान भएको छ । ओलीसँगको सहमति र अबको योजनामाथि छलफल गर्न नेपालले आफूपक्षीय केन्द्रीय सदस्यको बैठक बोलाएका हुन् । ओली र नेपालबीच पार्टीको विवाद समाधान गर्न कार्यदल बनाएर काम गर्ने सहमति बनेको छ । नेता नेपाल आफैले पनि फागुन २८ को निर्णय फिर्ता गर्ने र जेठ २ को अवस्थामा फर्काउन एउटा विधि बनाएर जाने सहमति नजिकपुगेको प्रतिक्रिया दिएका थिए । ओलीसँग सहमति नजिक पुगेपछि अन्तिम समयमा नेपाल समूहका सांसदहरुको राजीनामा पनि रोकिएको थियो । त्यसैलाई लिएर विपक्षी पार्टीहरुले नेपालले प्रतिबद्धताअनुसार भूमिका निर्वाह नगरेको भनेर उनको नियतमाथि प्रश्न उठाएका छन् ।