भ्रष्टाचार मुद्दा दायर भएपछि जसपाका सांसद सरोज सिंह निलम्बित

कोशीपारी अनलाइन संवाददाता
असोज ३१, काठमाण्डौं

सर्लाही । मधेस प्रदेशसभाका सांसद सरोज सिंह कुशवाहा पुनः पदबाट निलम्बित भएका छन् ।
अख्तियार दुरुपयोग अनुसन्धान आयोगले उनीविरुद्ध भ्रष्टाचार सम्बन्धी आरोपपत्र दायर गरेपछि प्रदेशसभाले शुक्रबार सूचना जारी गर्दै उनलाई निलम्बन गरेको हो ।
जनता समाजवादी पार्टी (जसपा) नेपालका कुशवाहालाई यसअघि पनि अख्तियारले अनुसन्धानका क्रममा जेठ २९ गते पक्राउ गरेपछि निलम्बन गरिएको थियो । तर भदौ १३ गते प्रदेशसभा सचिवालयले अख्तियारको प्रतिवेदनका आधारमा उनीमाथिको निलम्बन फुकुवा गरेको थियो ।
त्यसबेला अख्तियारले अदालतमा आरोपपत्र दायर नगरिएकाले र कुशवाहा धरौटीमा रिहा भएकाले निलम्बन हटाइएको उल्लेख गरिएको थियो । तर पछिल्लो अनुसन्धानपछि अख्तियारले कुशवाहामाथि पुनः भ्रष्टाचारको अभियोग दायर गरेको हो ।
कुशवाहाले विभिन्न उपभोक्ता समिति गठन गरी ती समिताबाट संकलित रकम आफ्ना निजी सचिव विनोदलाल कायस्थमार्फत आफ्नै खातामा जम्मा गरेको प्रमाण फेला परेको छ । सोही आधारमा अख्तियारले उनीमाथि आरोपपत्र दायर गरेको जनाएको छ ।
कुशवाहा महोत्तरी क्षेत्र नम्बर ४ (२) बाट निर्वाचित प्रदेशसभा सदस्य हुन्। उनको निलम्बनले हालै नियुक्त मधेस प्रदेशका मुख्यमन्त्री जितेन्द्र प्रसाद सोनलको विश्वासको मतमा असर पर्ने अनुमान गरिएको छ ।
५६ सांसदको समर्थनमा सरकार गठन गरेका मुख्यमन्त्री सोनलले जनमत पार्टीका दुई सांसदले समर्थन फिर्ता लिएपछि नै दबाब झेलिरहेका छन् ।
अब कुशवाहाको निलम्बनसँगै सरकारका लागि आवश्यक मतको सङ्ख्या अझै घट्ने देखिएको छ । मधेस प्रदेशसभामा हाल १०७ सदस्य छन् । तीमध्ये कुशवाहासहित एमालेका दीपेन्द्र ठाकुर र अभिराम शर्मा गरि तीन जना सांसद निलम्बित भइसकेका छन् ।