अमेरिकाले नेपालीलाई दिएको टीपीएस सुविधा खारेज, दुई महिनाभित्र स्वदेश फर्किन उर्दी

 काठमाडौं । संयुक्त राज्य अमेरिकाले नेपाली नागरिकलाई दिएको टेम्पोररी प्रोटेक्टेड स्टाटस (टीपीएस) सुविधा खारेज गरेको छ । अमेरिकाको गृह सुरक्षा मन्त्रालयले आज एक सूचना जारी गरी नेपालको अवस्थाको समीक्षा र सम्बन्धित साझेदार निकायहरूसँगको परामर्शपछि नेपालीले टीपीएसका लागि वैधानिक आवश्यकताहरू पूरा नगर्ने निष्कर्ष निकालेको जनाएको छ।

टीपीएसको मान्यता २०२५ अगस्त ५ को राति ११ः५९ बजे औपचारिक रूपमा समाप्त हुने बुधबार सार्वजनिक गरिएको सूचनामा उल्लेख छ । टीपीएस सुबिधा प्रयोग गर्दै अमेरिकामा बसोवास गर्दै आएका नेपालीहरुलाई ६० दिनको समयसीमा दिईएको छ ।

अमेरिकी राष्ट्रपति डोनाल्ड ट्रम्पको अघिल्लो कार्यकालमा समेत नेपाललाई टीपीएस खारेज गर्ने प्रक्रिया अघि बढेको थियो । त्यसबेला १२ महिनाभित्र नेपाल फर्किन समय सीमा तोकिएको थियो ।

टीपीएस हैसियतमा अमेरिकामा बसेका नेपालीहरूलाई अन्य हैसियतमा बस्ने वैधानिक आधार छैन भने अब स्वदेश फर्किने तयारी गर्न त्यहाँको गृह सुरक्षा मन्त्रालयले भनेको छ।

२०७२ को महाभूकम्पपछि अमेरिकाले नेपालीहरुलाई टीपीएसको सुविधा दिएको थियो । सो सुविधा अन्तर्गत अमेरिकामा सात हजार भन्दा बढि नेपाली अमेरिकामा बसोबास गर्दै आएको अनुमान छ ।