काभ्रेको पनौतीमा, विहे भोजमा सहभागिलाई कोरोना पुष्टि

१५ बैशाख २०७८, कोशीपारी अनलाइन/ बनेपा पनौती नगरपालिका वडा नम्बर १० मा विहे भोजमा सहभागि भएकामा कोरोना संक्रमण पुष्टि भएको छ । बैशाख ११ गते भएको विवाह भोजमा सहभागिमा कोरोना संक्रमण पुष्टि भएको पनौती नगरपालिकाको स्वास्थ्य शाखाले जनाएको छ ।

शुरुमा विवाह भएका घरको एकजना विरामी परेपछि अस्पताल लगिएको थियो । उनमा कोरोना संक्रमण देखियो । त्यसपछि भोजमा सहभागि अन्य ब्यक्तिमा पनि कोरोना भाइरसको लक्षण देखिएपछि परीक्षण गर्ने क्रममा कोरोना संक्रमण पुष्टि भएको हो । वडा नम्बर १० मा विवाह भएको घर परिवार सहित भोजमा सहभागि १५ जनामा कोरोना संक्रमण भएको स्वास्थ्य शाखा प्रमुख पुरुषत्तोम तिमल्सिनाले जानकारी दिनुभयो ।

विवाहमा सहभागि मध्ये २४ जनाको स्वाब हिजो संकलन गरिएको थियो । त्यस्तै नगरपालिकाको वडा नम्बर ८ का एक जना महिला र एक जना पुरुषमा पनि कोरोना संक्रमण पुष्टि भएको छ । नगरपालिकाले भिडभाड हुने कुनै पनि कार्यक्रम नगर्न र त्यस्ता कार्यक्रममा सहभागि नहुन सबैलाई आग्रह गरेको छ ।