अमेरिकासँग नेपालको लज्जास्पद हार

कोशीपारी अनलाइन संवाददाता
कात्तिक १०, काठमाण्डौं

नेपालले आइसिसी विश्वकप लिग टु अन्तर्गत युएई त्रिकोणात्मक सिरिजमा आइतबार भएको खेलमा अमेरिकासँग १ सय ६ रनको लज्जास्पद हार बेहोरेको छ ।
जितसँगै अमेरिका लिग टु अंक तालिकाको शीर्षस्थानमा उक्लिएको छ । टि–ट्वान्टी विश्व कप छनोटमा सानदार प्रदर्शन गरेको नेपालले आइतबार अत्यन्त कमजोर प्रदर्शन गर्यो ।
जितको लागि २ सय ६३ रनको चुनौती पछाएको नेपाल ३९.१ ओभरमा सबै विकेट गुमाउँदै १ सय ५६ रनमा अल आउट भयो ।
नेपालले रनको खाता नखोली ओपनर कुशल भुर्तेललाई गुमायो । दोस्रो बलमा रुसिल उगार्करको बलमा ओपनर कुशल दोस्रो बलमै कट बिहाइन्ड भए ।
६९ रन जोड्दा नेपालले दोस्रो विकेटको रूपमा भीम सार्की आउट भए । उनी २९ रन जोडेर पबिलियन फर्किए । कमजोर सुरूवात गरेको नेपालले ६९ रनमा नै अर्को विकेट गुमायो । आसिफ शेख ३७ रनमा हर्मितको बलमा आउट भए ।
नेपालले कुनै पनि समय साझेदारी बनाउन सकेन । कप्तान रोहित पौडेल मात्र २ रनमा शुभम रान्जानेको बलमा आउट भए । यसपछि आरिफ शेख २० रनमा र गुलशन झा ३ रनमा पबिलियन फर्किए ।
करण केसी २ रनमा र सन्दीप लामिछाने सामना गरेको पहिलो बलमा रनको खाता नखोली आउट भए । अन्तिम विकेटको रूपमा दिपेन्द्र आउट भए । नेपालको लागि सर्वाधिक ४० रन उनले नै जोडे ।
लिग –२ मा संघर्ष गरिरहेको नेपाल १२ अंक सहित अंक तालिकाको सातौं स्थानमा छ । अमेरिका ३० अंक सहित नेट रनरेटको आधारमा शीर्षस्थानमा उक्लिएको छ । नेपालले अब बिहीबार युएईसँग खेल्नेछ ।