५ सय र १ हजारको नयाँ नोट छाप्ने गभर्नर पौडेलको पहिलो निर्णय

  काठमाडौं । नवनियुक्त गभर्नर विश्वनाथ पौडेलले नेपाल राष्ट्र बैंकमा पुगेर पदभार ग्रहण गरेका छन् ।बुधबार शपथ ग्रहणपछि  बालुवाटारस्थित राष्ट्र बैंक पुगेका उनले ५०० र १ हजार रुपैयाँ दरका नयाँ नोट छाप्ने पहिलो निर्णयमा हस्ताक्षर गरे । पदबहाली लगत्तै उनले यस्तो निर्णय गरेका हुन् ।

पदभार ग्रहणपछि सञ्चारकर्मीसँग बोल्दै गभर्नर पौडेलले मौद्रिक नीति र सरकारको वित्त नीतिबीचको सम्बन्धबारे स्पष्ट धारणा राखे । उनका अनुसार, मौद्रिक नीति सरकारको वित्त नीतिको सहायक नभएर स्वतन्त्र नीति हो । तर सरकारको वित्त नीति कार्यान्वयनमा मौद्रिक नीतिबाट अवरोध भएमा त्यसमा आवश्यक परिमार्जन गरिने उनले बताए ।

बैंक तथा वित्तीय संस्थामा रहेको नागरिकको निक्षेपको सुरक्षा र कर्जा नीतिमा सुधारलाई पनि राष्ट्र बैंकले प्राथमिकतामा राख्ने उनले बताए । त्यस्तै, राष्ट्र बैंकले विभिन्न सरोकारवाला निकायहरुसँग समन्वय गरेर मात्रै निर्णय लिने उनको भनाइ छ ।

त्यस्तै उपयुक्त कर्जा नीति ल्याउनुपर्ने आवश्यकता रहेको उनको भनाइ छ । सबैसँग छलफल र परामर्श गरेर मात्रै मौद्रिक नीति ल्याइने उनले बताए । त्यस्तै, राष्ट्र बैंकले विभिन्न सरोकारवाला निकायहरुसँग समन्वय गरेर मात्रै निर्णय लिने उनको भनाइ छ ।मुलुकको आर्थिक गतिविधिलाई चलायमान बनाउनका लागि सबैसँग समन्वय गरेरै आफू अघि बढ्ने उनले बताए । पौडेलले बैंकका कार्यकारी निर्देशक गुणाकर भट्टले दिएको राजीनामा आन्तरिक विषय भएको उल्लेख गरे ।
सरकारले मंगलबार नेपाल राष्ट्र बैंकको गभर्नरमा डा. विश्वनाथ पौडेललाई नियुक्त गरेको थियो ।