बिहीबारदेखि मात्र मौसममा सुधार आउने मौसमविद्को अनुमान

काठमाण्डौं :  मध्य भारत र बंगालको खाडीमा  रहेको न्यूनचापीय प्रणालीमा पश्चिमी वायु प्रणालीको बलियो प्रभाव रहेकाले दुई दिनदेखि देशभर देखिएको मौसमी प्रभाव बिहीबारदेखि कमजोर बन्दै जाने मौसमविद्हरुले अनुमान लगाएका छन् ।

पर्सिदेखि क्रमिक रुपमा मौसममा सुधार आउने जल तथा मौसम पूर्वानुमान महाशाखाकी मौसमविद् सजिना शाक्यले बताएकी छन्। यसैबीच आज र भोलि भने धेरै स्थानमा मौसम यस्तै रहने उहाको अनुमान छ। महाशाखाका अनुसार बंगालको खाडी हुँदै आएको यो प्रणालीको बढी असर दुई दिन अघि देखि नै सूदूर पश्चिम प्रदेशमा देखिएको छ जसका कारण सूदूरपश्चिमका विभिन्न स्थानमा भारी वर्षा का कारण जनजीवन कस्टकर बनेको छ।

वर्षाका कारण सेती, महाकालीलगायतका नदीमा बाढी ले रेकर्ड तोडेको छ भने नदीले कटानसमेत गरेको छ । हिमाली जिल्लाहरुमा समेत भारी वर्षा भएपछि बाढी र पहिरो निम्तिएको छ ।

हिमाली क्षेत्रमा भारि हिमपातको सम्भावना भएकाले पदयात्रा नगर्न मौसमविद्हरुले सुझाएका छन् । सूदूरपश्चिमको डडेलधुरामा २४ घण्टामा मनसुन अवधिमाजस्तै वर्षा भएको छ । डडेलधुरामा २२०, दिपायलमा १८७.५, धनगढीमा १४०.२ मिमि वर्षा रेकर्ड भएको छ । यसै गरि प्रदेश १ का केही स्थानमा पनि भारी वर्षा भएको छ । सूदूरपश्चिम, कर्णाली, लुम्बिनी र वाग्मती प्रदेशका केही स्थानमा अझै भारी वर्षाको सम्भावना भएकाले सचेत रहन विभागले सूचित गरेको छ । कतिपय नदीमा जल सतह बढेको र अझै बढ्न सक्ने भएकाले सतर्कता अपनाउन ध्यानाकर्षण समेत विभागले गराइएको छ ।