माओवादी केन्द्रले गर्यो सम्मेलन तालिका परिवर्तन

काठमाडौँ : गठबन्धन सरकार साझेदार दल माओवादी केन्द्रको मंगलबार बिहान पार्टी कार्यालयमा बसेको स्थायी कमिटी बैठकले सम्मेलनको तालिकामा केहि हेरफेर गरेको छ।

आजको बैठकले पार्टी सदस्यता नवीकरणका निम्ति कात्तिक २५ गतेसम्म म्याद थप गरेको छ भने टोल सम्मेलन कात्तिक २७ गतेसम्म, वडा सम्मेलन मंसिर ४ गतेसम्म, पालिका सम्मेलन मंसिर ११ गतेसम्म र प्रदेश सम्मेलन मंसिर २५ गतेसम्म गर्ने गरी म्याद थप गरेको पार्टीका प्रवक्ता कृष्णबहादुर महराले जानकारी गराएका छन्।

संचारकर्मिहरुसंग बोल्दै महराले १४९ जनाको सल्लाहकार समिति बनाउने, ९९ जनाको ज्येष्ठ कम्युनिष्ट मञ्च बनाइएको, पेसलकुमार पोखरेलको अध्यक्षतामा २५ सदस्यीय लेखा आयोग बनाइएको, टंक राईको अध्यक्षतामा २५ जनाको अनुशासन आयोग बनाइएको र १७५ जनाको विशेष समिति बनाइएको समेत बताएका छन् ।

उनले भने, ‘भूगोलभन्दा बाहिर काम गर्ने साथीहरूको विशेष समिति १७५ जनाको बनाइएको छ, हामीले हाम्रो पार्टीमा प्रवेश गरेका विभिन्न सांगठनिक कुराहरूको बारेमा पनि छलफल भएको छ, यसमा कार्यदलले एउटा प्रतिवेदन प्रस्तुत गरेको छ, प्रतिवेदनमा विभिन्न ४५ साना ठूला दलले निर्णय गरेका छन्, त्यस निर्णयअनुसार कार्यदलले गरेको छलफललाई अनुमोदन गरेको छ।’

माओवादी केन्द्रको अर्को स्थायी कमिटीको बैठक कात्तिक ४ गते बिहीबार बिहान ८ बजे बस्ने निर्णय समेत प्रवक्ता महराले बताएका छन् ।