मुगु बस दुर्घटनाबारे छानबिन गर्न प्रदेश प्रहरीद्वारा छानबिन समिति गठन

काठमाडौँ : कर्णाली प्रदेश प्रहरी कार्यालय सुर्खेतले मुगुमा भएको बस दुर्घटनाको छानबिन गर्न समिति गठन गरेको छ। दुर्घटनाको सत्यतथ्य पत्ता लगाई १० दिनभित्र प्रतिवेदन पेस गर्न प्रदेश ट्राफिक प्रहरी कार्यालयका प्रहरी नायब उपरीक्षक वीरेन्द्रवीर विश्वकर्माको संयोजकत्वमा तीन सदस्यीय समिति गठन गरेको कार्यालयले जनाएको छ।

नेपालगञ्जबाट मुगु सदरमुकाम गमगढी जाँदै गरेको छायाँनाथ रारा यातायात प्रालिद्वारा सञ्चालित भे१ख ३१६७ नं को उक्त बस मंगलबार जुम्ला–मुगु सडक खण्डमा पर्ने पिनातपने खोलामा दुर्घटना हुँदा ३२ जनाको मृत्यु हुनुका साथै १३ जना घाइते भएका थिए । चालकको सिटमुनिको टायर पङ्चर भई दुर्घटना भएको प्रारम्भिक अनुमान गरिएपनि छानबिन समितिको स्थलगत अनुसन्धान प्रतिवेदनका आधारमा वास्तविक कारण पत्ता लाग्ने भन्दै छानविन समिति गठन गरिएको हो ।