एमालेले उपमहासचिवको व्यवस्था हटाउने

 

काठमाण्डौं : नेकपा एमालेको विधान महाधिवेशनमा उपमहासचिव पद नराख्ने प्रस्ताव गरिएको छ । विधान महाधिवेशनमा पेस गरिएको विधान संशोधन प्रस्तावमा यसअघि व्यवस्था भएको उपमहासचिव नराख्ने गरी हेरफेर गरिएको हो।

यसअघि १४ जना पदाधिकारी रहेका भए पनि अब १३ जना रहनेछन्। जसमा एक अध्यक्ष, पाँच उपाध्यक्ष, एक महासचिव, ६ सचिव रहनेछन्। केन्द्रीय कमिटीमा कम्तीमा एकतिहाइ महिला रहनुपर्ने व्यवस्था गरिएको छ। कुल दुई सय २५ सदस्यीय केन्द्रीय कमिटी निर्वाचित हुनेछ। प्रदेश कमिटीका अध्यक्षहरू केन्द्रीय कमिटीका पदेन सदस्य रहनेछन्।

ललितपुरको गोदावरीमा सुरु भएको विधान महाधिवेशनमा उपस्थित प्रतिनिधिहरूलाई वितरण गरिएको दस्तावेजमा उपमहासचिव नरहने प्रस्ताव रहेको छ ।एमालेको नवौँ महाधिवेशनबाट उपमहासचिवमा विष्णुप्रसाद पौडेल र घनश्याम भुसाल निर्वाचित भएका थिए ।