कांग्रेसको पोखरा महानगर सभापतिमा विजुक्छे विजयी

 

पोखरा:नेपाली कांग्रेस पोखरा महानगर कार्यसमितिको सभापतिमा सुरेन्द्रमान विजुक्छे विजयी भएका छन् । शनिबार सम्पन्न निर्वाचनको मतपरिणाम अनुसार अन्य चार प्रतिस्पर्धीलाई पराजित गर्दै विजुक्छे सभापति बनेका हुन् । ४१४ मत ल्याउँदै उनी महानगर सभापतिमा विजयी भएका हुन् ।

उनका निकटतम प्रतिस्पर्धी गगांधर पराजुलीले ३ सय ४६ मत ल्याए । पराजुली नेपाल पत्रकार महासंघको पूर्व उपाध्यक्ष समेत हुन् । देशकै ठूलो महानगर पोखराको सभापतिका लागि विजुक्छे र पराजुलीसहित रामराज लामिछाने, मिलन तिवारी, ज्योति हमाल र मोहनप्रसाद बास्तोला पनि प्रतिस्पर्धामा थिए ।

कांग्रेस पोखरा महानगर उपसभापतिमा प्रयागराज भण्डारी भवसागर बराल विजयी भएका छन् । सचिवमा टुवराज बास्तोला र गणेशबहादुर थापाले बाजी मारे । महानगरमा क्षेत्रीय प्रतिनिधि र वडा अध्यक्ष गरी १ हजार ३७० मतदाता थिए । त्यसमध्ये १ हजार ३४४ मत खसेको निर्वाचन अधिकृत आरसी विमलले जानकारी दिए ।