आफू नेत्तृत्वको लोकप्रिय सरकारविरुद्ध लेख्ने पत्रकार र तिनका मालिकलाई विभूषण दिइयो : ओली

 

काठमाण्डौं : नेकपा एमालेका अध्यक्ष केपी शर्मा ओलीले आफू नेतृत्वको सरकारको विरोध गर्ने, मिडियाका मालिक र पत्रकारलाई अहिलेको सरकारले विभूषण प्रदान गरेको भन्दै आरोप लगाएका छन् । आईतबार च्यासलमा आयोजित संविधान दिवसको अवसरमा भएको कार्यक्रमलाई सम्बोधन गर्ने क्रममा पूर्व प्रधानमन्त्रीसमेत रहेका एमाले अध्यक्ष ओलीले यस्तो बताएका हुन् ।

‘अघिल्लो सरकार,जो लोकप्रिय सरकार थियो, जो विकासप्रेमी सरकार थियो। सुशासनका लागि लड्थ्यो। त्यो सरकारको विपक्षमा खोइरो खनेर निराधार एउटा पनि सकारात्मक समाचार नदिने सबै बेठिक, बेठिक समाचार दिएर देशलाई भड्खालामा हाल्न खोज्ने सञ्चार माध्यम र तिनका मालिकहरू ठूला ठूला पदकहरूबाट विभुषित भए’, उनले भने।

‘मुद्दा जिताइदिने हराइदिने, आँखामा पट्टी बाँध्ने । आँखामा पट्टी बाँधे पनि तराजु त छामे पनि देखिन्थ्यो नि,’ ओलीले भने,‘ यो सबैका लागि लज्जाजनक विषय हो। इतिहासले निर्मम मूल्याङ्कन गर्नेछ।’

पूर्व प्रधानमन्त्री ओलीले कमसेकम खोज पत्रकारीता गर्ने, लोकतन्त्रको पक्षमा र पत्रकारीताको पक्षमा पत्रकारीताको धर्म निर्वाह गर्ने पत्रकारहरुलाई सम्मान गर्नुपर्ने बताए ।उनले जे पायो त्यहि विषयमा मुद्दा हाल्ने, जे पायो त्यहि लेख्ने, झगडियाहरु सम्मानित भएको भन्दै दुई चार जना छुटेको जस्तो लागेको समेत बताए ।