राष्ट्रिय जनमोर्चाले भन्यो, देशलाई मध्यावधिमा धकेल्न एमालेले राज्यका निकायमाथि आक्रमण थाल्यो

काठमाडौँ:  राष्ट्रिय जनमोर्चाले पुनर्स्थापित संसदलाई भंग गरेर देशलाई मध्यावधि निर्वाचनमा धकेल्न नेकपा एमालेले राज्यका निकायमाथि आक्रमण केन्द्रित गरेको आरोप लगाएको छ । एमालेले राज्यका अभिन्न निकाय निर्वाचन आयोग, सरकार र सभामुखमाथि आक्रमण गर्न थालेको जनमोर्चाको आरोप छ ।

जनमोर्चाका अध्यक्ष चित्रबहादुर केसीले शुक्रबार प्रेस वक्तव्य जारी गर्दै भनेका छन्, ‘पुनर्स्थापित संसदलाई भंग गरेर देशलाई मध्यावधि निर्वाचनमा धकेल्नका लागि ओली पक्षले निर्वाचन आयोग, सरकार र सभामुखमाथि आक्रमण केन्द्रित गरेको छ । त्यसैले प्रतिगमनविरुद्धको संघर्षको आवश्यकता कायमै रहेको छ । त्यसका लागि पाँचदलीय गठबन्धनलाई अझै मजबुत पार्नुपर्ने आवश्यकता छ ।’