प्रतिनिधिसभा बैठक दिउँसो १ बजे बस्ने

 

काठमाडौं : प्रतिनिधिसभा बैठक आज बस्ने भएको छ। संघीय संसद सचिवालयले बैठक मंगलबार दिउँसो १ बजे बानेश्वरस्थित संघीय संसद भवनमा बस्ने जनाएको हो ।

प्रमुख प्रतिपक्षी नेकपा एमालेले निरन्तर संसद बैठक अवरोध गरिरहेको छ । संसदमा उत्पन्न गतिरोध अन्त्य गर्न सभामुख अग्निप्रसाद सापकोटाले पहल थालेका छन् । सभामुखले सोमबार सर्वदलीय बैठक पनि राखेका थिए । उक्त बैठकमा नेकपा एमालेका अध्यक्ष केपी शर्मा ओली भने अनुपस्थित रहेका थिए। ओलीको अनुपस्थितिले हिजोको बैठक बिना निस्कर्ष टुंगिएको थियो।

संसद सचिवालयले मंगलबार बस्ने प्रतिनिधिसभा बैठकको कार्यसूची सोमबार नै सार्वजनिक गरेको छ । आज दिउँसो बस्ने बैठकका लागि सम्भावित कार्यसूची सार्वजनिक गरेको हो । सचिवालयका अनुसार अर्थमन्त्री जनार्दन शर्माले ‘विनियोजन विधेयक, २०७८ माथि विचार गरियोस्’ भनि प्रस्ताव प्रस्तुत गर्ने कार्यसूची रहेको छ । यस्तै बैठकमा २०४८ सालमा राष्ट्रिय सभामा मनोनित सदस्य रुक्म शम्शेर जवराको निधनप्रति शोक प्रस्ताव प्रस्तुत गर्ने कार्यसूची रहेको संसद सचिवालयले जनाएको छ ।