नेपाल आइन् एमसीसी उपाध्यक्ष फतिमा

काठमाडौं : अमेरिकी सहयोग नियोग ‘मिलेनियम च्यालेन्ज कर्पोरेसन’ एमसीसीको डिपार्टमेन्ट अफ कम्प्याक्ट अपरेसन्सकी उपाध्यक्ष फतिमा जे सुमार र सहायक उपाध्यक्ष जोनाथन ब्रुक्स र उनका टोली काठमाडौं आइपुगेका छन् । नेपालको चारदिने भ्रमणका क्रममा आज बिहान कतार एयरको विमानबाट फातेमा काठमाडौं आइपुगेकी हुन् ।

फतिमाको टोली एमसीसीबारे नेपाल सरकारसँग छलफल गर्न आएको हो । एमसीसी सम्झौता पास गर्ने विषयमा नेपाली राजनीतिक पार्टीहरुबिचमा एकमत देखिएको छैन । नेपालमा अमेरिकी अनुदान सहयोग सम्बन्धी एमसीसी परियोजनाको प्रगति बुझ्ने सिलसिलामा उपाध्यक्ष सुमार काठमाडौं आएको स्रोतले जनाएको छ । नेपालमा एमसीसी परियोजना स्वीकार गर्ने कि नगर्ने भन्ने बहस भइरहेको बेला उनको यो भ्रमणलाई चासोका साथ हेरिएको छ ।

उपाध्यक्ष सुमारले नेपाल बसाइँको क्रममा एमसीसी परियोजना कार्यान्वयनको अवस्थाबारे प्रधानमन्त्री शेरबहादुर देउवा, अर्थमन्त्री जनार्दन शर्मालगायत विभिन्न राजनीतिक दलका शीर्ष नेताहरुसँग भेटघाट गर्ने कार्यक्रम छ ।

बिहीबार बिहानैदेखि सिनामंगल, थापाथली, नयाँबानेश्वर, पुतलीसडक, माइतीघर, महाराजगञ्ज लगायतका स्थानमा एमसीसीको विरोधमा हुन सक्ने प्रदर्शनलाई लक्षित गरी सुरक्षा व्यवस्था कडा पारिएको छ । काठमाण्डौको यी ठाउँहरुमा नेपाल प्रहरी र सशस्त्र प्रहरी गणको टोली परिचालन गरिएको छ । सन् २०१९ मा नै कार्यान्वयनमा आउनुपर्ने एमसीसी परियोजना नेपालमा राजनीतिक खिचातानीका कारण अझै अगाडि बढ्न सकेको छैन । हालै नेपाल सरकारले स्पष्ट हुन खोजेका विषयमा एमसीसीले जवाफ पठाएको छ । सो क्रममा एमसीसीले अमेरिकी सैन्य गठबन्धन वा सुरक्षा रणनीतिसँग यसको सम्बन्ध नभएको जनाएको छ ।