शेयर बजारमा हालसम्मकै नयाँ रेकर्ड

कोशीपारी अनलाईन, काठमाडौं :
२०७८ जेठ १०
नेपाली शेयर बजारमा सोमबार नयाँ कीर्तिमान कायम भएको छ । यसअघिका सबै रेकर्डहरु ब्रेक गर्दै आज १३ अर्ब १७ करोड रुपैयाँ भन्दा बढीको सेयर खरिदबिक्री भएको हो । यसअघि गत बुधबार सबैभन्दा धेरै ११ अर्ब ९५ करोड ८० लाख रुपैयाँभन्दा बढीको सेयर कारोबार भएको थियो । तर सोमबार यो रेकर्ड पनि तोडिएको हो । नेप्से सूचक पनि ३.०७ अंकले बढेर अहिलेसम्मकै उच्चतम २८२३.०६ विन्दुमा आइपुगेको छ ।

आम लगानीकर्ताहरु उत्साहित हुँदा खरिदबिक्रीमा बढोत्तरी आएको देखिन्छ । व्यक्तिगत तथा संस्थागत लगानीकर्ताहरु अहिले सेयर बजारमा सक्रिय रहेका छन् । यसबाहेक यो सेयर बजारको सिजन पनि हो । सिजनमा बढी चहलपहल हुनुलाई स्वभाविक मान्न सकिन्छ । यसबाहेक चालु आर्थिक वर्ष सकिन करिब डेढ महिनाजति मात्र समय छ । यसअवधिमा विकास खर्च धेरै हुने अपेक्षा गर्न सकिन्छ ।

१३ मध्ये ५ समूहको सूचक वृद्धि भएको छ । वाणिज्य बैंक समूह पनि हरियो बनेको छ । निर्जीवन बिमा समूह र इन्भेष्टमेन्ट समूहमा बढी तेजी आएको छ । खरिदबिक्री रकममा १ अर्ब २६ करोड रुपैयाँभन्दा बढीसहित एचआइडीसीएल अग्रस्थानमा रहेको छ । यसैगरी, दोस्रोमा नेको इन्सुरेन्स र तेस्रोमा नेपाल पुनर्बिमा कम्पनी परेको छ । ४ कम्पनीको भाउ ९% भन्दा बढीले वृद्धि भएको छ ।