चीनले विकास गरेको एआई चस्माले दृष्टिविहीनहरुको दैनिकी सहज बनाउँदै

कोशीपारी अनलाइन
पागुन २७, काठमाण्डौं

चीनले विकास गरेको कृत्रिम बुद्धिमत्ता (एआई) प्रविधिमा आधारित चस्माले दृष्टिविहीन व्यक्तिहरूको दैनिकी सहज बनाउन नयाँ सम्भावना देखाएको छ । चीनको हाङझाउ सहरमा विकास गरिएको यस एआई चस्माले दृष्टिविहीन व्यक्तिलाई बाटो पहिचान गर्न, अवरोध चिनाउन र गन्तव्यसम्म पुग्न सहयोग पु¥याउन थालेको छ ।

पूर्वी चीनको हाङझाउकी काइ क्योङहुईले सात वर्षको उमेरमै दृष्टि गुमाएकी थिइन् । हाल उनी एक कुशल पियानो ट्युनरका रूपमा काम गर्छिन् र अन्य दृष्टिविहीन संगीतकर्मीसँग मिलेर अर्केस्ट्रामा समेत प्रस्तुति दिन्छिन् । तर, एक्लै हिँडडुल गर्नु भने अझै चुनौतीपूर्ण रहेको उनी बताउँछिन् ।
उनका अनुसार हाल प्रयोगमा रहेका अधिकांश नेभिगेसन सफ्टवेयर तथा सहयोगी उपकरणले अन्तिम गन्तव्य नजिक पुगेपछि सही जानकारी दिन नसक्ने समस्या हुन्छ । “अधिकांश नेभिगेसन सफ्टवेयर अन्तिम १० मिटरमा असफल हुन्छन, जसले गर्दा म धेरै पटक बाटो हराउँछु र गन्तव्य भेट्टाउन सक्दिनँ,” उनले भनिन् । “दृष्टिविहीन मानिसहरू बाहिर निस्कन चाहन्छन् । तर यस्तो अवस्थाको डरले हिच्किचाउँछन् ।”

यही समस्यालाई समाधान गर्न हाङझाउस्थित एक प्रविधि कम्पनीले दृष्टिविहीनका लागि विशेष एआई चस्मा विकास गरेको हो । कम्पनीले सडक क्रसिङ, सिँढी र अन्य सम्भावित जोखिम पहिचान गर्न प्रणालीलाई तालिम दिन आधा वर्षभन्दा बढी समय लगाएर डाटा संकलन गरेको जनाएको छ । कम्पनीका अनुसार यस प्रणालीको प्रतिक्रिया समय ५०० मिलिसेकेन्डबाट घटाएर करिब ३०० मिलिसेकेन्डमा ल्याइएको छ, जसले प्रयोगकर्तालाई अझ सुरक्षित अनुभव प्रदान गर्छ ।

अलिबाबा क्लाउडको टोंगयी छियानवेन ठूलो भाषा मोडेल सेवाका महाप्रबन्धक स्यू डोङका अनुसार ठूलो एआई मोडेलले वातावरणसँग मानिसजस्तै अन्तक्र्रिया गर्न सक्ने भएकाले यसले दृष्टिविहीन व्यक्तिका लागि “आँखा, कान र मुख” जस्तै काम गर्न सक्छ र उनीहरूको जीवनस्तर सुधार गर्न सहयोग पु¥याउँछ ।

बजार अनुसन्धान कम्पनी ओम्डियाका अनुसार चीन एआई चस्माको बजारमा अमेरिकापछि दोस्रो ठूलो बजार बन्ने क्रममा छ । यस वर्ष मात्रै करिब १२ लाख युनिट एआई चस्मा निर्यात हुने अनुमान गरिएको छ । सीसीटीभी