प्रतिपक्षको अवराेधकै बीच राष्ट्रिय सभामा विधेयक अघि बढाइयो

प्रमुख प्रतिपक्ष दल नेकपा एमालेको लगातारको अवरोधका बीच राष्ट्रिय सभाले चार वटा विधेयक दफावार छलफलका लागि समितिमा पठाएको छ । आज सोमवार बसेको राष्ट्रिय सभाको बैठकले नेकपा एमालेको विरोधका बीच सरकारले पेस गरेको चार वटा विधेयकलाई दफावार छलफलका लागि विधायन व्यवस्थापन समितिमा पठाउने प्रस्तावलाई स्वीकृत गरेको हो ।

प्रधानमन्त्री शेरबहादुर देउवाको तर्फबाट कानुन, न्याय तथा संसदीय मामिला मन्त्री ज्ञानेन्द्रबहादुर कार्कीले प्रस्तुत गर्नुभएको खाद्य स्वच्छता तथा गुणस्तर विधेयक २०७७, सार्वजनिक सेवा प्रसारण विधेयक २०७७, अभिलेख संरक्षण (पहिलो संशोधन) विधेयक २०७७ र सुरक्षण मुद्रणसम्बन्धी विधेयक २०७७ लाई दफावार छलफलका लागि विधायन व्यवस्थापन समितिमा पठाइयोस् भन्ने प्रस्तावलाई बैठकले स्वीकृत गरेको छ ।

नेकपा एमालेले राष्ट्रिय सभाको बैठकमा निरन्तर विरोध गरे पनि बैठकको नियमित कार्य र कार्यसूचीमा भएको काम भने राेकिएको छैन । एमालेले कारबाही गरेका १४ जना सांसदको निष्कासनकाे सूचना टाँस गर्नुपर्नेमा सभामुखले नटाँसेका कारण सभामुखको विरोधमा एमाले आन्दोलित छ । प्रतिनिधि सभामा नेकपा एमालेका सांसदहरूले नाराबाजीसहित बेल घेराउ गर्दै उभिएर विरोध गरेका छन् ।