संविधान दिवस : देशभर विभिन्न कार्यक्रम गरी मनाइँदै

 

काडमाण्डौं : नेपाली जनताले आफ्ना प्रतिनिधिमार्फत लेखाएको संविधानले आज सातौँ दिवस मनाउँदैछ। तत्कालीन सात राजनीतिक दल र विद्रोही नेकमा माओवादीबीच भएको शान्ति सम्झौता, अन्तरिम संविधान, संविधानसभा निर्वाचन र जनताका प्रतिनिधिमार्फत २०७२ सालको असोज ३ गते नेपालको संविधान जारी गरिएको थियो। सोही सम्झनामा हरेक वर्षझै आज पनि देशभर विभिन्न कार्यक्रम गरी संविधान दिवस मनाइँदै छ।

२०६२ ६३ को जनआन्दोलनपछि प्राप्त भएका उपलब्धिहरू नयाँ संविधानमा राखिएका छन् । जनताको आर्थिक, सामाजिक तथा सांस्कृतिक अधिकारसहित समाजवाद स्थापना गर्ने लक्ष्यसहित लेखिएको हाल कार्यान्वयमा रहेको नेपालको संविधान विगतको भन्दा विशिष्ट र फरक रहेको छ।

विसं २०७२ असोज ३ गते संविधान जारी भएको दिनको स्मरणमा हरेक वर्ष संविधान दिवस मनाइँदै आएको छ। सरकारको निर्णयानुसार असोज २–४ गते राष्ट्रिय दिवसका रूपमा नेपाल र विदेशस्थित नेपाली राजदूतावास र नियोगमा दीपावलीलगायत कार्यक्रम गरी मनाउन लागिएको छ। राष्ट्रिय दिवस मनाउन प्रधानमन्त्रीको अध्यक्षतामा मूल समारोह समिति गठन गरिएको छ। दिवसका अवसरमा आइतबार सैनिक मञ्च टुँडिखेलमा विशेष समारोहको आयोजना गरिएको छ।

वर्तमान सरकारले संविधानको कार्यान्वयनका लागि आवश्यक पर्ने कानुनी तथा नीतिगत विषयलाई सम्बोधन गरेको छ भने सङ्घीयताको कार्यान्वयनका लागि आवश्यक पहल र प्रयत्न गरिरहेको छ। मूल समारोह समितिअन्तर्गत प्रचारप्रसार उपसमितिले दिवसको व्यापक प्रचारप्रसारका लागि सरकारी, सामुदायिक तथा निजी क्षेत्रका सञ्चारमाध्यमलाई यसअघि नै आग्रह गरेको थियो। त्यसै अनुसार विभिन्न पत्रपत्रिका तथा रेडियो टेलिभिजनले विशेष कार्यक्रमहरु गदैछन् ।

आज नेपाली सैनिक मञ्च, टुँडिखेलमा हुने संविधान दिवस विशेष औपचारिक समारोहको नेपाल टेलिभिजन र रेडियो नेपालले प्रत्यक्ष प्रसारण गर्नेछ।