माधव नेपाल समुहको सांसदहरुको बैठक सिंहदरबारमा बस्दै

७ जेष्ठ २०७८, कोशीपारी अनलाइन संवाददाता/काठमाडौँ — नेकपा (एमाले) का वरिष्ठ नेता माधवकुमार नेपाल समूहका सांसदहरूको बैठक बसिरहेको छ । 

पछिल्लो राजनीतिक घटना क्रमका विषयमा सिंहदरबारस्थित संसद् सचिवालयलको सार्वजनिक लेखा समितिको हलमा बैठक जारी रहेको सांसद झपट रावलले जानकारी दिए ।

उनका अनुसार शुक्रबारको बैठकमा माधव नेपाल, भीम रावल, रामकुमारी झाँक्री, जीवनराम श्रेष्ठ, विरोध खतिवडालगायत २० भन्दा बढी सांसदको उपस्थिति रहेको छ ।

राष्ट्रपति विद्यादेवी भण्डारीले संविधानको धारा ७६ को उपधारा ५ बमोजिम नयाँ सरकार गठनका लागि प्रतिनिधिसभा सदस्यहरूलाई शुक्रबार साँझ ५ बजेसम्मको समय दिएका कारण दलहरुको भेटघाट र छलफल तीव्रता पाएका छन् । बिहान कांग्रेस सभापति शेरबहादुर देउवा निवास बूढानीलकण्ठमा बसेको विपक्षी गठबन्धनको बैठक विनानिष्कर्ष सकिएको थियो । उक्त बैठकमा पनि एमालेको माधवकुमार नेपाल समूहका नेताहरूको पनि सहभागी थियो । कांग्रेस र माओवादी केन्द्र, जनता समाजवादी पार्टीसहितको विपक्षी गठबन्धनको बैठक आगामी रणनीतिका विषयमा कुरा नमिलेपछि आजै ३ बजे सिंहदरबारमा संयुक्त रूपमा बस्ने सहमति भएको छ । संयुक्त बैठकअगाडि नेपाल पक्षका सांसदहरुको बैठक बसेको हो ।