काभ्रे खोपासिमा विवाहमा सहभागी १७ जनामा कोरोना पुष्टि, विवाह घरकै एकजना भेन्टिलेटरमा

१५ बैशाख, २०७८ कोशीपारी अनलाईन काभ्रे।

काभ्रेको खोपासीमा भएको विवाहमा सहभागी १७ जनामा कोरोना संक्रमण पुष्टि भएको छ। मंगलबार २४ जनाको स्वाव संकलन गरी परिक्षण गर्दा १७ जनामा कोरोना पोजिटिभ देखिएको हो । पनौती नगरपालिका–१० का ११ जना महिला र ४ जना पुरुष तथा वडा नम्बर ८ का १ जना पुरुष र १ जना महिलामा संक्रमण पुष्टि भएको पनौती नगरपालिकाका स्वास्थ्य शाखा प्रमुख पुरुषोत्तम तिमल्सिनाले जानकारी दिए।

कोरोना पुष्टि भएका सबै वैशाख ११ गतेको विवाहमा सहभागी भएका थिए। संक्रमित मध्ये विवाह घरकै एक जनालाई भेन्टिलेटरमा राखेर उपचार भइरहेको छ। अरु सबै होम आइसोलेशनमा बसेका छन्। कोरोना संक्रमित हुनेहरूमा १७ वर्षदेखि ८४ वर्ष उमेर समूहसम्मका छन्।