मुगु दुर्घटना मृतकका परिवारलाई राहत र घाइतेको निःशुल्क उपचार गर्ने प्रधानमन्त्रीको घोषणा

 

काठमाडौं : प्रधानमन्त्री शेरबहादुर देउवाले दसैंका बेला सडक दुर्घटनामा परी निधन भएका व्यक्तिका परिवारलाई उचित क्षतिपूर्ति दिने घोषणा गरेका छन्। प्रधानमन्त्री देउवाले मुगु, कास्की र अछाममा भएका सडक दुर्घटनाको समाचारले आफू स्तब्ध भएको भन्दै सरकारले पीडितलाई राहत र घाइतेलाई निःशुल्क उपचारको व्यवस्था गर्ने घोषणा गरेका हुन्।

उनले सडक दुर्घटना न्यूनीकरणका लागि सार्वजनिक–निजी सवारी साधनको नियमित परीक्षण एवं मर्मत गर्न, क्षमताभन्दा बढी यात्रु नराख्न र सुरक्षाका सबै मापदण्डहरू अपनाउन पनि सम्बन्धित सबैको ध्यानाकर्षण गराएका छन् । मंगलबार मुगुमा भएको बस दुर्घटनामा ३२ जनाको ज्यान गएको थियो । यसैगरी सोमबार कास्कीमा आठ जना र अछाममा चार जनाको मृत्यु भएको थियो ।