प्रकृतिको अनुपम उपहार कुविन्डे ताल

 

प्रकृतिको अनुपम उपहार कुविन्डे ताल बन्काड कुविन्डे नगरपालिका वडा नं. १ मा अवस्थित रहेको छ । पछिल्लो सर्वेक्षणअनुसार दहको गहिराई ३४ मिटर रहेको छ भने लम्वाई ८३४ मिटर, चौडाइँ ५३८ मिटर रहेको छ । यसै गरि दह २३.५३ हेक्टर क्षेत्रफलमा फैलिएको छ । समुन्द्री सतहदेखि ११५० मिटरको उचाइँमा रहेको यो ताल ३ तर्फ जंगलले घेरिएको छ भने उत्तरतिर पानीको निकास रहेको छ ।हेर्दा कुविन्डाको आकारको भएको हुँदा यसको नाम कुविन्डे दह रहेको भनिन्छ भने तालको माथिल्लो भागमा कुभिन्डे गाउँ पनि रहेको छ । यस दहको पानी बालुवा संग्रही खोलामा परिणत भएर भेरीमा नदीमा समाहित हुन्छ ।

अग्ला पहाड हरुले चारैतिरबाट घेरिएको कुविन्डे ताल क्षेत्रमा हरियो सल्लाघारी सुसाइरहेको सुनिन्छ । बीचमा नीलो र निर्मल ताल यसो हेर्दा मुटु/ पानको पात जस्तो देखिन्छ । सरर्र चिसो हावा चलि रहनेहुनाले , हावाको वेगसँगै बग्ने लहरले कलात्मक दृश्य तालमा कोरिदिन्छ जसलाई हेर्दा स्वर्गको अनुभूति हुन्छ ।

कुविन्डे तालको किनारमा लस्करै कलात्मक डुंगाहरु राखियको छ भने नजिकै भैरवको मन्दिर छ । त्यहाँ ईश्वरको बास भएको जन विश्वास रहेको छ । भैरवको शक्तिका कारण तालमा पात पर्ने बित्तिकै चराले टप्प टिपेर लान्छन् र ताल सधै सफा र कन्चन देखिन्छ ।

दह हुनुपूर्व गाउँ भएको यस स्थानमा एक पटक एउटा साधु त्यसगाउँमा बास बस्न आएछन् । गाउँभरि कसैले वास दिए पछि एकजना वृद्धाले वास त दिइन तर खानेकुार केही नभएको हुँदा अन्यत्रबाट मागेर ल्याएर खान दिइछन् । ती साधुले भोलीपल्ट विहान बास दिने वृद्धालाई भनेछन् म कैलु बराह हुँ । यो गाउँलाई पानीमा डुवाई दिन्छु । तपाई कुविन्डे गाउँतिर जानुस भनेर गाउँलाई पानीको दह बनाई दिएछन् । त्यसैले पछिसम्म पनि दहभित्र भिभिन्न प्रकारका आकृतिहरु देखिने गरेको किम्वदन्ती पाइन्छ ।

 

हाल कुविन्डे दह नेपालका १०० गन्तव्यहरुभित्र चयन भएकाले यसको सदुपयोग गर्न हर प्रयास गर्नुपर्दछ । दहको तीनतिर जंगल भएर पनि एउटा पनि पात पतिङ्गर नदेखिनु, त्यस्ता पतिङ्गर चराले टिपेर लैजानु, पानीले बर्षाद्, हिउँद र गर्मीमा आफ्नो रंग बदल्ने आकर्षक तालको वरिपरि रहेको जंगलको संरक्षण, त्यहाँसम्म पुग्ने बाटोको पिन हुनुपर्ने र तलाउमा जाने गेग्रानहरुलाई बस्न नदिने तटवन्ध निर्माण र त्यहाँ पुग्ने नित्य नैमित्य पुजा र पूर्णिमा, संक्रान्तिमा हुने विशेष पुजाको लागि नरपालिकाबाट बजेट व्यवस्था, तलाउमा सयर गर्नका लागि आधुनिक ढुंगाहरुको व्यवस्थाको लागि पहल लिन आवश्यक छ । जनस्तरबाट सुविधा सम्पन्न होटेल, मित्रतापूर्ण व्यवहारको बिकास गरि सल्यान लगायत समग्र कर्णालीको आर्थिक बिकास मा सुधार गर्न सकिन्छ।