टिकटकले युट्युबलाई पार्‍यो पछि

युवा पुस्तामाझ निकै लोकप्रिय बनिरहेको चिनियाँ एप टिकटकले अमेरिका र बेलायतमा युट्युबलाई पछि पारेको छ । एपहरुको अनुगमन गर्ने कम्पनी एप एन्नीको रिपोर्ट अनुसार हरेक प्रयोगकर्ताले एपमा बिताउने औसत समयको मामिलामा टिकटक सबैभन्दा अगाडि देखिएको छ ।

तथापि सम्पूर्ण प्रयोगकर्ताले समग्रमा खर्चिने कुल समयमा भने युट्युब नै पहिलो स्थानमा छ । युट्युब प्रयोगकर्ताको संख्या पनि टिकटकको तुलनामा अत्यधिक र लामो भिडियोहरु हुने हुनाले सम्पूर्ण प्रयोगकर्ताले खर्चिने कुल समय युट्युबको धेरै रहेको हो ।

रिपोर्ट अनुसार टिकटकलगायतका लाइभ स्ट्रिमिङ एपहरुले सर्जकहरुलाई भुक्तानी गर्ने रकममा पनि तीव्र वृद्धि भैरहेको छ । सन् २०२१ को पहिलो अर्धवार्षिकमा शीर्ष २५ वटा सोसल मिडिया एपहरुले सर्जकहरुलाई भुक्तानी गरेको कुल रकमको तीन चौथाई रकम लाइभ स्ट्रिमिङ फिचर भएका एपहरुले भुक्तान गरेका छन् । त्यस्तै प्रयोगकर्ताले एपमा खर्चिने रकममा पनि लाइभ स्ट्रिमिङ फिचरयुक्त एपहरु अग्रस्थानमा छन्।