अनुगमन सङ्गै स्वास्थ्य सामग्री वितरण गर्दै इन्द्रावती गाउँपालिका

१८ जेष्ठ २०७८, निर्मला तामाङ, कोशीपारी अनलाइन संवाददाता/सिन्धुपाल्चोक : विश्वभर महामारीको रूपमा फैलिएको कोरोना भाइरस (कोभिड-१९) ले नेपालमा पनि दिनानुदिन भयबाह स्थिती सिर्जना भएको छ । दिनानुदिन संक्रमितको संख्या बढ्दै गैरहेका छन् भने मृत्यु हुनेको पनि उस्तै स्थिती छ । कोरोना महामारी रोकथामका लागि सरकारले लकडाउन गरेपछि शहर मात्र नभई गाउँ वास्तीमा समेत जनजीवन कष्टकर बन्दै गएको छ । हरेक स्थानीय सरकारले आफ्नो जनताको सुरक्षाको लागि विभिन्न कार्यक्रमहरु सन्चालन गर्दै आएका छन् । इन्द्रावती गाउँपालिकाले पनि हरेक वडाहरुको अनुगमन सङ्गसङ्गै स्वास्थ्य सामग्री समेत वितरण गरेका छन् । गाउँपालिकाले हाल सम्म ७, १०, ११ र १२ वडाहरुमा गै प्रत्यक्ष अनुगमन गरिएको र माक्स, सेनिटाइजर, थर्मल लगायतका स्वास्थ्य सामाग्री वितरण गरेको जानकारी गाउँपालिका अध्यक्ष बंशलाल तामाङले हामीलाई दिनुभएको छ । उहाँले भन्नुभयो “अहिले पालिका भित्र कोरोना संक्रमितको संख्या घट्दो क्रममा छ, हामी निरन्तर संक्रमितहरुसङ्गै सम्पर्कमा नै छौ, हामी हरेक वडा वडामा पुगि संक्रमीत हरुको स्थिती बुझ्न र वडाहरुलाई आवश्यक स्वास्थ्य सामाग्री वितरण नि गर्दैछौ ।” यो सङ्गै पालिकाले निरन्तर जनचेतना र उच्च सतर्कता अपनाउन समेत पहल गर्दै आएको छ । इन्द्रावती गाउँपालिकाले दिएको जानकारी अनुसार हाल सम्म पालिका भित्र ६४३ जनाको कोरोना परिक्षण गरिएको जसमा १९२ जनामा कोरोना संक्रमण देखिएका छन् । संक्रमित मध्ये हाल सम्म ७४ जना कोरोना संक्रमणबाट मुक्त भएका छन् । त्यस्तै गरि वडा नम्बर ७ मा बनाएको आइसोलेसनमा २ जना संक्रमित रहेको र अन्य संक्रमितहरु होम आइसोलेसनमा नै रहेका छन् । साथै पालिकाले कोरोना भाइरस (कोभिड-१९) संक्रमण रोकथाम तथा न्यूनीकरणको लागि सबै पालिका वासीलाई लकडाउनको पालना गरि घरमा नै बस्न पनि आग्रह गरिएको छ ।