रुघाखोकी लागेको छ?चिन्ता लिनुपर्दैन, सामान्य रुघाखोकी लागेको बेला पिसिआर पोजिटिभ आउँदैन

२९ बैशाख २०७८, कोशीपारी अनलाइन काठमाडौ / सामान्य रुघाखोकी लागेको बेला पिसिआर परीक्षण गराएमा रिर्पोट पोजोटिभ आउँछ भन्ने धारणा राख्ने गरेको पाइएको छ ।

तर, रुघाखोकी लाग्दैमा गराएको पिसिआर परीक्षणको नतिजामा कोरोना पोजेटिभ आउने वा कोरोना भाइरसबाट सङ्क्रमित भएको पुष्टि हुने हुँदैन । सामान्य रुघाखोकी लागेको बेला पिसिआर परीक्षण गराएमा रिर्पोट पोजोटिभ आउँछ भन्ने धारणा गलत हो । स्वाब परीक्षण वा पिसिआर परीक्षणले सक्रिय सङ्क्रमित पहिचान गर्न वा कुनै व्यक्ति कोरोना भाइरसबाट सङ्क्रमित छ कि छैन भनेर पहिचान गर्न प्रयोग गरिन्छ ।

वैज्ञानिकका अनुसार पिसिआर परीक्षण विशेष रूपमा कोभिड निम्त्याउने जिम्मेवार सार्स–कोभ–२ भाइरस पत्ता लगाउनका लागि डिजाइन गरिएको हो । पिसिआर परिक्षणले सार्स–कोभ २ भाइरसको आनुवंशिक सामग्री पत्ता लगाएर नतिजा दिने क्लिनिकल बायोकेमिस्ट्री एन्ड लेबोरेटरी मेडिसनका लागि एसोसिएसन माइक्रोबायोलोजी कमिटीका अध्यक्ष डा. रोब सोर्टेन बताउँछन् ।

भाइरसको आनुवंशिक सामग्री फरक हुने हुँदा फ्लू वा सामान्य रुघाखोकीको भाइरस भएमा व्यक्तिले पिसिआर परीक्षण गर्दा रिपोर्ट पोजिटिभ आउने सम्भावना निकै कम वा असम्भवजस्तै हुन्छ । तर, पिसिआर परीक्षण गर्दा रिपोर्ट फल्स नेगेटिभ (सङ्क्रमण भए पनि नदेखिने) आउन सक्छ । परीक्षण नमुना दूषित भएमा, सही तापमानमा भण्डारण नगरेमा वा आरएनए पत्ता लगाउन प्रयोग गरिएको रसायनले ठीकसँग काम नगर्दा भने यसले फल्स नेगेटिभ नतिजा दिन सक्छ ।

कोरोना भाइरसको सङ्क्रमण पुष्टि गर्नका लागि एन्टिबडी परीक्षण पनि गरिन्छ । तर, एन्टिबडी परीक्षणले सक्रिय सङ्क्रमण नभई विगतमा भएको सङ्क्रमणविरुद्ध एन्टिबडी बनाएमा मात्र रिपोर्ट पोजिटिभ देखाउने हुन्छ । एन्टिबडी परीक्षणले कोभिडबाहेकका अन्य कोरोना भाइरस पनि टिप्न सक्छन् । रोग नियन्त्रण तथा रोकथाम केन्द्र (सिडिसी) सक्रिय सङ्क्रमण पहिचान गर्न एन्टिबडी परीक्षण प्रयोग नगर्न सल्लाह दिन्छन् ।