८३ वर्षपछि थातथलोमा

रामेछाप — बेपत्ता भएको ८३ वर्षपछि रामेछापको खिम्तीका दिलनाथ अधिकारी थातथलो खोज्दै बिहीबार गाउँ आइपुगेका छन् । काठमाडौंको सडकमा एक्लै भौतारिँदै गरेको अवस्थामा भेटिएका ९३ वर्षीय उनलाई नवजीवन परोपकार समाजले खिम्ती ल्याइपुर्‍याएको हो ।

खिम्तीमा उनका खलक भेटिए । बाल्यकालमा पानी खाएको धारा भेटियो । उनले रमाउँदै त्यही धाराको पानी खाए । जन्मेको घर अहिले छैन । घडेरीमात्र छ । त्यही घडेरी घुमे । नाताले नाति नातिनी पर्ने सँग रमाए । घर नजिकैको रन बन हेरें । छिन छिनमा भावुक भए । सानैमा घर छोडेर हिँडेका ९३ वर्षीया वृद्ध अधिकारीले सुरुमा आफ्नो जन्मघर रामेछापको कठजोर रहेको बताएका थिए । दिलनाथ अधिकारीलाई काठमाडौंको सडकमा भेटेर संरक्षण दिँदै आएको नवजीवन परोपकार समाजले बुधबार साँझ मन्थली ल्याएर बिहीबार कठजोरको अधिकारी टोलमा लगेको थियो । सदरमुकामभन्दा १४ किलोमिटर पूर्वको कठजोरमा पुग्दा उनका खलक भेटिएनन् । बरु त्यहाँ पुग्दा उनले नाम लिएका गाउँ टोल रामेछापकै खिम्तीमा रहेको जानकारी भयो । ‘त्यसपछि हामीले उहाँलाई खिम्ती लग्यौं ’ समाजका अध्यक्ष दुर्गानाथ दाहालले भने ।

अधिकारीका अनुसार उनका बाबुको नाम लक्ष्मीप्रसाद अधिकारी हो । दाजु यज्ञप्रसाद बोल्न नसक्ने थिए । बाबु बितेपछि सहारा भएन र घरबाट निस्के अधिकारी भन्छन्– कहिले कता कहिले कता गर्दै घर फर्कन सकिनँ । उनले १० वर्षको उमेरमा दिदीको घर एकानकास्थलीमा ब्रतबन्ध गरेका थिए । विवाह गरेका छैनन् ।

अधिकारी घरबाट हिडेंपछि काठमाडौं पुगें । जागिरको खोजी गर्दै जादा श्री शम्शेर राणाको दरबारमा भान्से काम मिल्यो । त्यही छिरे र भान्सैमा ६० वर्ष बिताए । कहिले निस्के भन्ने उनलाई थाहा नै छैन । काठमाडौंमा कोरोना बढेका बेला गएको भदौमा उनी सडकमा बर्बराई रहेको बेलामा फेला परे र समाजले संरक्षण दियो । संरक्षणमा रहेका बेला अधिकारीलाई घर टोल जाने इच्छा जाग्यो । उनले समाजका अध्यक्ष दाहाललाई घर पुर्‍याइदिन भने । बाल्यकाल बिताएको ठाउँको सम्झना आयो अधिकारी भन्छन्– ‘अहिले आएँ, उ बेलाका मेरा साथीसंगी कोही बाँकी छैनन् होला ।’ नभन्दै उनले आफ्नो बालसखा भेटेनन् ।