जुम्लामा एउटै कुकुरले १४ लाई टोक्यो, भ्याक्सिनको अभाव

कोशीपारी अनलाइन संवाददाता/दानबहादुर बुढा
भदौ २२, मुगु

जुम्लाको तातोपानी गाउँपालिका वडा नं. २,४ र ६ का १४ जना स्थानीयलाई आइतबार एकै कुकुरले क्रमश आक्रमण गरेपछि कर्णाली स्वास्थ्य विज्ञान प्रतिष्ठानमा उपचार भइरहेको छ ।
कुकुरको आक्रमणबाट घाइते भएका १४ जना मध्य वडा नंं. २ का ५ जना (नरेन्द्र केसी,सर्केनी बुढा, धने रोकाया, मयालु रोकाया, गोरे सार्की) घाईते भएका छन् ।
त्यस्तै वडा नं. ४ का ७ जना (सभ्यता हमाल, बिजकन्या न्यौपाने, लटे कामी, मन्नु न्यौपाने, संगिता समिक्षा विक र सुर्दशन विक) घाइते छन् भने वडा नं. ५ की मेनका नेपाली र वडा नंं ६ की सरिता कामी गरी चार वडाका १४ जना घाइते भएको तातोपानी गाउँपालिका स्वास्थ्य शाखा प्रमुख गुरु प्रसाद चौलागाईले बताए ।
रेविज लागेको भुसिया कुकुरले टोकेको ७२ घण्टा भित्र अनिवार्य रुपमा लगाउनु पर्ने ‘एमिनो ग्लोबिन’ औषधी जुम्लामा छैन् ।
एन्टी रेविज भ्याक्सीन जिल्लामा केही मात्रामा भएपनि एमिनो ग्लोबिन नाम औषधी जुम्लामा नभएपछि कालिकोटबाट मगाइएको स्वास्थ्य शाखा प्रमुख चौलागाईले कर्णाली मिसनलाई जानकारी दिए ।
कर्णाली स्वास्थ्य विज्ञान प्रतिष्ठानका डाक्टर कमल थानीको समन्वय तथा तातोपानी गाउँपालिकाको लगानीमा एमिनो ग्लोबिन औषधी जुम्ला ल्याउन लागिएको छ ।
तातोपानी गाउँपालिका अध्यक्ष नन्द प्रसाद चौलागाँईले घाईते नागरिकको सकुशल उपचारका लागि पालिकाले बजेट खर्च र कुनै पनि हालतमा उक्त भ्याक्सीन ल्याउन अनुरोध गरेपछि ३२ डोज एमिनो ग्लोविन कालिकोट बाट ल्याउन लागिएको हो ।
३२ डोजका लागि आबश्यक पर्ने ३२ हजार रुपैया तातोपानी गाउँपालिकाले तिर्ने छ । प्रति डोजको एक हजारका दरले ३२ हजारको ३२ डोज एमिनो ग्लोबिन कालिकोटबाट ल्याईदै छ । कर्णाली स्वास्थ्य विज्ञान प्रतिष्ठानका निमित्त अस्पताल निर्देशक डाक्टर कमल थानीले घाइते सबैलाई एन्टी रेविज खोप लगाइएको बताएका छन ।
उनले भने,‘एमिनो ग्लोबिन औषधी जुम्ला र नेपालगन्जमा पनि भेटिएनन् । कालिकोट भएकाले समन्वय गरेर ल्याउँदै छौ । ७२ घण्टा भित्र उक्त औषधी दिनैपर्छ । अहिले घाउमा टाका पनि लगाउन मिल्दैन् । कम्तीमा एक हप्तासम्म भर्ना गरेर उपचार गर्नु पर्छ । अहिले घाइतेहरुको भर्ना भइरहेको छ ।’
यता तातोपानी गाउँपालिका वडा नं. २ का अध्यक्ष चन्द्रमान बुढाले १४ जनालाई आक्रमण गर्ने कुकरलाई नियन्त्रण लिएको जानकारी दिएका छन् ।