स्वास्थ्यमन्त्री पौडेलले गरे कान्ति बाल अस्पतालको अनुगमन, ७२ जना अस्थायी कर्मचारीहरुको पदपूर्ती गर्ने

कोशीपारी अनलाइन संवाददाता
भदौ २२, काठमाण्डौं
काठमाडौं । स्वास्थ्य तथा जनसंख्या मन्त्री प्रदीप पौडेलले काठमाडौंको महाराजगन्जस्थित कान्ति बाल अस्पताल बालबालिका तथा किशोरकिशोरी मानसिक स्वास्थ्य केन्द्रको अनुगमन गरेका छन् ।
आइतबार स्वास्थ्यमन्त्री पौडेलले कान्ति बाल अस्पताल बालबालिका तथा किशोरकिशोरी मानसिक स्वास्थ्य केन्द्रको अनुगमन गरेका हुन् ।
यसैक्रममा बोल्दै पौडेलले हरेक वर्ष २५ सयका दरले सङ्गठन तथा व्यवस्थापन सर्वेक्षण (ओएनएम) गर्न सके यस वर्ष बाल कान्ति अस्पतालका २५० जना स्वास्थ्यकर्मीहरु आउनसक्ने बताए ।

उनले भने, ‘हामीले डाक्टर, नर्स, स्वास्थ्यकर्मि बाहेक केही राखेका छैनौ । पहिला स्वास्थ्य संस्थाहरु प्राविधिक स्वास्थ्यकर्मीहरुले भरिएको हुनुपर्छ । त्यसैले हामीले स्वास्थ्य प्राविधिकहरुको ५ वर्षसम्म हरेक वर्ष २५ सयका दरले सङ्गठन तथा व्यवस्थापन सर्वेक्षण (ओएनएम) गर्ने प्रस्ताव गरेका छौ । त्यसमा यही वर्ष त्यो ओएनएम भयो भने २५० स्वास्थ्यकर्मीहरु कान्ति अस्पतालमा आउनसक्ने छ ।’
यस्तै उनले हरेक वर्ष २५ सयका दरले ओएनएम गरी ५ वर्षमा साढे १२ हजार प्राविधिक स्वास्थ्यकर्मीहरु पुग्ने पनि जानकारी दिए ।
साथै उनले कान्ति बाल अस्पताल बालबालिका तथा किशोरकिशोरी मानसिक स्वास्थ्य केन्द्रमा अस्थायीरुपमा काम गरिरहेका ७२ जना कर्मचारीहरुको विज्ञापन गरी छिट्टै पदपूर्ती गर्ने समेत बताए।