कर्णालीमा दशैँको बेला २१ दुर्घटना, ३७ जनाको मृत्यु, ११ जनाले गरे आत्महत्या

 

काठमाण्डौ : दशैँको अवधिभर कर्णाली प्रदेशमा साना ठूला गरी २१ सडक दुर्घटना भएका छन् । प्रदेश प्रहरी कार्यालय सुर्खेतले ती दुर्घटनामा परी ३७ को ज्यान गएको जनाएको छ ।

कर्णाली प्रदेश प्रहरी कार्यालयकाअनुसार दशैँमा ठूलो मानविय क्षती हुनेगरी मुगुमा बस दुर्घटनामा भएको हो । मुगुमा भएको दुर्घटनामा ३२ जनाको मृत्यु भएको छ भने ११ जना घाइते छन् । सुर्खेतमा ९ ओटा सवारी दुर्घटनामा तीन जनाको मृत्यु र २२ जना घाइते छन् ।

यस्तै, दैलेखमा चार ओटा सवारी दुर्घटनामा ७ जना घाइते छन् भने, सल्यानमा दुई ओटा सवारी दुर्घटनामा १६ जना घाइते भएका छन् । जाजरकोट, रुकुमपश्चिम, जुम्ला र कालिकोटमा एक- एक ओटा सवारी दुर्घटना भएका छन् । यी जिल्लामध्य रुकुम र जुम्लामा एक- एक जनाको मृत्यु भएको छ । कालिकोट र जाजरकोटमा भएका दुर्घटनामा तीन -तीन जना घाइते छन् । त्यस्तै प्रदेशमा दशैँ अवधिभर ११ जनाले आत्महत्या गरेको प्रदेश प्रहरीले जनाएको छ ।