एनआरएनएले कार्यकालको म्याद थप्यो, नोभेम्वर ३० भित्र निर्वाचन

 

काठमाण्डौं : गैरआवासीय नेपाली संघ (एनआरएनए) को कार्यकाल ६ महिना थप गरिएको छ । संघको शनिबार सम्पन्न बैठकले विधानको धारा १३ को उपधारा २ बमोजिम वर्तमान कार्यसमितिको कार्यकाल ६ महिना थप्ने निर्णय गरेको संघका सचिव गौरीराज जोशीले जानकारी दिए।

बैठकमा अध्यक्ष कुमार पन्तले परराष्ट्र मन्त्रालयको पत्रकै कारण १० औं महाधिवेशन समयमै गर्न नसकिएको र मन्त्रालयकै कारण वर्तमान कार्यसमितिले आफ्नो म्याद थप्न बाध्य भएको भन्दै आगामी नोभेम्बर ३० भित्र संघको निर्वाचन गर्ने बताएका छन् ।

संघको १० औं महाधिवेशन तथा विश्व सम्मेलनको लागि ६४ देशका ३ हजार ५ सय प्रतिनिधिहरु चयन भइसकेका छन्। संघको विधानअनुरुप यसअघि नै राष्ट्रिय समितिको महाधिवेशनबाट अन्तराष्ट्रिय समन्वय परिषद्को सदस्यहरु चयन भैसकेका छन् भने आगामी निर्वाचनबाट क्षेत्रीय संयोजक सहित ४८ जना पदाधिकारी निर्वाचित हुने छन्।