‘सहायक श्रीमान्’ अन्तर्राष्ट्रिय चलचित्र महोत्सवमा छनोट

 

काठमाडौं : नेपालको बहुपति प्रथाका विषयमा निर्मित ‘सहायक श्रीमान्’ नयाँ डकुमेन्ट्री फिल्म को–हजबेन्ड अमेरिका र युरोपका प्रतिष्ठित चलचित्र महोत्सवहरुमा छनोट भएको छ ।

युरोपको जर्मनीस्थित १८औं टेगेन्सी इन्टरनेसनल माउन्टेन फिल्म फेस्टिबल, स्लोभाकियाको २९औं इन्टरनेसनल फिल्म फेस्टिबल अफ माउन्टेन फिल्मस् पोपराडमा को–हजबेन्ड छनोट भएको हो । दुवै देशमा १३–१७ अक्टोबरसम्म हुने यो चलचित्र महोत्सवका लागि नेपालबाट पत्रकार गणेश पाण्डेद्वारा निर्देशित उक्त फिल्म छानिएको हो । सो फिल्मले यसअघि नेपाल अन्तर्राष्ट्रिय चलचित्र महोत्सव निफमा अन्तर्राष्ट्रिय प्रतिस्पर्धामा उत्कृष्ट वृत्तचित्र अवार्डसहित एक हजार अमेरिकी डलर जितेको थियो ।

अन्तर्राष्ट्रिय पर्वतारोहण महोत्सव किम्फमा रिलिज गरिएको बहुपति प्रथामा आधारित ३५ मिनेटको यो डकुमेन्ट्री फिल्म कर्णाली प्रदेशको हुम्लामा छायाङ्कन गरिएको हो । घरमा जति दाजुभाइ छन्, एउटै श्रीमती बिहे गर्ने संसारकै अनौठो चलन अहिले पनि नेपालका कतिपय हिमाली जिल्लामा विद्यमान छ । हुम्लाको लामा समुदायमा अहिले पनि दाजुभाइका लागि एउटै श्रीमती बिहे गर्ने चलन छ । एउटै श्रीमतीसँग जीवन बिताएका र विद्रोह गरेका तीनवटा परिवारको सोही विषयलाई पहिलोपटक डकुमेन्ट्री मार्फत पर्दामा उठाएको छ ।