एमालेमा फेरि बल्झियो १० बुँदे विवाद:रावललगायत नेताहरुको यस्तो चेतावनी

काठमाण्डौं : नेकपा एमालेभित्र फेरि विवाद चुलिएको छ । पार्टी विभाजन रोक्न असन्तुष्ट नेताहरूसँग नेकपा एमालेको संस्थापन पक्षले गरेको १० बुँदे सहमति विवाद केन्द्रीय कमिटी बैठकमा सतहमा आएको हो ।

१० बुँदे सहमति कार्यान्वयन नभएको भन्दै उपाध्यक्ष भीम रावललगायत नेताहरुले केन्द्रीय कमिटी बैठक बहिष्कार गर्ने चेतावनी दिएपछि विवाद देखिएको हो। विधान महाधिवेशनमा प्रस्तुत हुने विभिन्न प्रतिवेदन तथा दस्तावेजबारे एमालेमा छलफल चलिरहँदा अध्यक्ष केपी शर्मा ओली इतर समूहका नेताहरुले चेतावनी दिएका हुन् । उनीहरुले १० बुँदे सहमति अनुसार एमालेको कार्यविभाजन २ जेठ २०७५ मा जस्तो छ त्यस्तै हुनुपर्ने अडान राखेका छन् । तर, ओलीले जस्ताको तस्तै कार्यान्वयन नहुने बताउँदै आएका छन् ।

एमालेको विधान महाधिवेशन १५ देखि १७ असोजसम्म ललितपुरको गोदावरीमा हुने तय भएको छ । विधान महाधिवेशनमा एमालेमा उमेरहद, पदाधिकारीलगायत कार्यकारिणीको निर्वाचन प्रक्रियालगायतको टुंगो लगाउन दस्तावेज तयार भइरहेको छ । १० बुँदे सहमितिअनुसार एमालेमै रहने निर्णय गर्नुभएका ११ जना स्थायी कमिटी सदस्य र उहाँहरू निकटका केन्द्रीय सदस्यले १० बुँदे हुबहु कार्यान्वयन नभए बैठकमा नबस्ने बताए पनि अध्यक्ष केपी ओलीले भने स्थायी कमिटी बैठक बसेर टुंगो लगाइने बताउनु भएको बैठकमा सहभागी एक नेताले जानकारी दिनुभएको छ । तर असन्तुष्ट नेताहरूले भने दुईवटा प्रदेशमा देखिएको विवाद समाधान नभए संघर्षमा उत्रने चेतावनी दिएका छन् ।