सभामुखले बोलाएको कुनैपनि बैठकमा ओली सहभागि नहुने

 

काठमाडौं:  सभामुख अग्निप्रसाद सापकोटाले आह्वान गरेको सर्वदलीय बैठकमा एमाले अध्यक्ष तथा संसदीय दलका नेता केपी शर्मा ओली नजाने भएका छन्। सभामुख अग्निप्रसाद सापकोटाको आह्वानमा आज २ः३० बजेका लागि संसदमा प्रतिनिधित्व गर्ने दलहरुको संयुक्त बैठक संघीय संसद् भवनमा रहेको लोत्से हलमा बैठक बोलाईएको छ ।

सर्वदलीय छलफल संसदमा जारी गतिरोध अन्त्यलगायतका समसामयिक विषयमा केन्द्रित रहने सभामुखको सचिवालयले जनाएको छ । छलफलमा प्रधानमन्त्री एवं कांग्रेस संसदीय दलका नेता शेरबहादुर देउवा, विपक्षी दलका नेता केपी शर्मा ओली, माओवादी केन्द्रका संसदीय दलका नेता पुष्पकमल दाहाल ‘प्रचण्ड’, नेकपा एकीकृत समाजवादीका संसदीय दलका नेता माधव कुमार नेपाल, जसपा संसदीय दलका नेता उपेन्द्र यादव र लोसपाका नेता महन्थ ठाकुरलाई बोलाइएको छ । यसैगरी राष्ट्रिय जनमोर्चाकी दुर्गा पौडेल, नेमकिपाका प्रेम सुवाल र राप्रपाका राजेन्द्र लिंदेनलाई पनि बैठकमा आमन्त्रण गरिएको सभामुखको सचिवालयले जनाएको छ ।

सभामुख सापकोटाले प्रमुख विपक्षी दलका नेताको हैसियतमा ओलीलाई व्यक्तिगत रुपमा पत्र पठाएरै निम्ता गरेका छन् । तर, स्रोतका अनुसार बैठकमा एमालेबाट संसदीय दलका उपनेता सुवास नेम्वाङ, प्रमुख सचेतक विशाल भट्टराईलगायतका नेतामात्रै सहभागी हुनेछन् । पार्टीले कारबाही गरेका माधव नेपाल सहितका १४ सांसदलाई पदमुक्त गर्नबाट रोकेर सभामुख सापकोटाले एमाले फुटाउन सहयोग गरेको आरोप एमालेले लगाउँदै आएको छ । त्यस्तै ओली सभामुखले बोलाएका कुनै बैठकमा नजानेसमेत स्रोतले दाबी गरेको छ ।