अध्यक्ष ओलीले कम्युनिस्ट आन्दोलन ध्वस्त पार्ने काम गरिरहेको खनाल–नेपाल समुहको आरोप

नेकपा एमालेको वरिष्ठ नेताद्धय झलनाथ खनाल र माधवकुमार नेपाल समूहले प्रधानमन्त्री समेत रहेका पार्टी अध्यक्ष केपी शर्मा ओलीले कम्युनिस्ट आन्दोलन ध्वस्त पार्ने काम गरिरहेको आरोप लगाएको छ । सो समूहले आज संयुक्त वक्तव्य जारी गर्दै अध्यक्ष नै पार्टी विभाजनमा लागेको आरोप लगाएका हुन् ।  सो समूहले जारी गरेको विज्ञप्तिमा नेपाली जनताले ५ वर्षका लागि निर्वाचित गरेको प्रतिनिधि सभालाई असंवैधानिक किसिमले विघटन गर्ने निर्णय बदर भएपछि उत्तेजित बनेका ओलीले कम्युनिस्ट आन्दोलनलाई ध्वस्त गर्ने षड्यन्त्रपूर्ण काम गरिरहेको उल्लेख छ । पार्टीलाई जोगाउने आफूहरूको प्रस्ताव ओलीले अस्वीकार गरेको पनि सो समूहको आरोप छ । फागुन २३ गतेको सर्वोच्चको फैसलापछि ओलीले पार्टीभित्र स्वेच्छाचारी गतिविधि अगाडि बढाएको खनाल नेपाल समूहको ठहर छ ।  वरिष्ठ नेता नेपाल र नेता भीम रावललाई विभिन्न झुठा लाञ्छना लगाउँदै ६ महिनाका लागि पार्टी सदस्यबाट समेत निलम्बन गर्ने पार्टीको विधानविपरीत स्वेच्छाचारी कार्य भएको सो समूहको निष्कर्ष छ । ओलीले पार्टीभित्र अन्तद्र्धन्द्व चर्काउन दुराशय राखेको पनि खनाल नेपाल समूहको बुझाइ छ । सरकार भ्रष्टाचारमा लागेको पनि यो समूहले आरोप लगाएको छ । खनाल नेपाल समूहले पार्टीभित्र विभाजनको पक्षमा लागेका ओलीको कदमको विरोध गर्न कार्यकर्तालाई आग्रह गरेको छ ।