स्थानीयका लागि जारी गरिएको मध्य भोटेकोशीको आइपीओ तत्कालका लागि स्थगित

कोशीपारी अनलाईन
२०७८ वैशाख २३, काठमाडौं ।

मध्य भोटेकोशी जलविद्युत कम्पनीले आयोजना प्रभावितका लागि निष्कासन खुला गरेको आइपीओ तत्काललाई बन्द हुने भएको छ । बिक्री प्रबन्धक ग्लोबल आइएमई क्यापिटलका अनुसार दोस्रो लहरको कोरोना भाइरस संक्रमणका कारण सिन्धुपाल्चोक जिल्लामा आज (वैशाख २३ गते) देखि वैशाख ३१ गते राति १२ बजेसम्म निषेधाज्ञा लगाइएको छ । निषेधाज्ञाको समयमा स्थानीयवासीलाई आइपीओ भर्नका लागि हिडडुलमा समस्या हुने भएकाले तत्काललाई स्थगित गर्न लागिएको हो ।

आजै, नेपाल धितोपत्र बोर्डको अनुमति लिएर आइपीओ स्थगनको सूचना प्रकाशन हुने पनि क्यापिटलले जनाएको छ । अब कहिलेबाट बिक्री खुला गर्ने भन्नेबारेमा अर्को सूचना सार्वजनिक गरिने पनि बिक्री प्रबन्धकले जानकारी दिएको छ । मध्य भोटेकोशीले वैशाख २१ गतेबाट सिन्धुपाल्चोक जिल्लाका आयोजना प्रभावितका लागि कुल ६० लाख कित्ता आइपीओ निष्कासन गरेको थियो ।

कम्पनीले सिन्धुपाल्चोक जिल्लाको आयोजना प्रभावित क्षेत्र भोटेकोशी गाउँपालिका वडा नम्बर १ र ५ (साविक लिस्ती गा.वि.स. र साविक मार्मिंग गा.वि.स.) र बाह्रबिसे नगरपालिका वडा नम्बर ५ र ६ (साविक गाती गा.वि.स.) तथा बाह्रबिसे नगरपालिका वडा नम्बर ७ र ८ (घुम्थांग गा.वि.स. र मानेश्वरा गा.वि.स.) मा स्थायी बसोबास गर्ने बासिन्दाहरुको लागि ३०% ले हुन आउने १८ लाख कित्ता साधारण शेयर र माथि उल्लेखित आयोजनाबाट प्रभावित क्षेत्र बाहेक सिन्धुपाल्चोक जिल्लाका अन्य क्षेत्रमा स्थायी बसोबास गर्ने बासिन्दाहरुको लागि ७०% ले हुन आउने ४२ लाख कित्ता साधारण शेयर निष्काशन गरेको थियो ।