विभिन्न कार्यक्रम गरि जिल्ला सहकारी संघ काभ्रेले सहकारी दिवस मनाउने

काभ्रे – राष्ट्रिय सहकारी दिवसको अवसरमा जिल्ला सहकारी संघ काभ्रेले विभिन्न कार्यक्रम गर्ने भएको छ । “मर्यादित व्यवसाय र प्रविधिमा सहकारी” भन्ने नारा सहित चैत्र १९ गते ६४ औं राष्ट्रिय सहकारी दिवसका सन्दर्भमा जिल्लामा विभिन्न कार्यक्रमको आयोजना गरिएको संघले जनाएको छ ।

संघको जानकारी अनुसार नेपालमा कृषि समस्या समाधानका लागि सहकारीको भूमिका विषयक एक दिवसीय गोष्ठिको आयोजना गर्ने गरिएको छ । कार्यपत्र प्रस्तुतका लागि नेपाल सरकारका सचिव गोपिनाथ मैनालीले उक्त कार्यक्रममा कार्यपत्र प्रस्तुत गर्ने संघले जनाएको छ । त्यस्तै सहकारी संघले चैत्र २० गतेका दिन संघमा रहेको नेपालको राष्ट्रिय झण्डा फेर्ने तथा पूजा गर्ने कार्यक्रम रहेको र सोहि दिन ११ बजे देखि रक्तदान कार्यक्रम आयोजना गर्ने र सोहि दिन बेलुका साँझ ७ बजे संघको कार्यालयमा दीपावली समेतको आयोजना गर्ने संघले कार्यक्रम तयार गरेको छ ।

जिल्लामा १४ सय ९५ वटा सहकारी संस्था/संघहरुको छाता संघ रुपमा रहेको संघले आफ्ना सहकारी सदस्य संस्था /संघहरुका लागि पत्राचार, अपिल र विभिन्न सामाजिक सञ्जाल मार्फत सूचना समेत जारी गर्दै आइरहेको छ । संघका अध्यक्ष दिलिप शर्माले यो वर्षको राष्ट्रिय सहकारी दिवसलाई भब्य रुपमा सफल बनाउन जिल्लामा रहेका सबै संघ/संस्था, अभियानकर्मी र सम्बद्ध सबैमा हार्दिक अनुरोध समेत गरेका छन् । त्यस्तै चैत्र १९ गतेका दिन जिल्ला सहकारी संघ लि. मा आर्थिक कारोबार गरेका सहकारी संस्थाहरु मध्ये उत्कृष्ट रहेका संस्था मध्ये ३ वटालाई संरक्षित पूजी फिर्ता कोषको रकम हस्तान्तरण गर्ने कार्यक्रम रहेको संघका अध्यक्ष दिलिप शर्माले जानकारी दिए ।